| |
Валегь Гьамзаев
(Сувагылий Гьамзат)
Ватан
Хъигъечlе гъу хаанче юххьан адыйнкъаl,
Гьавейнче Наврузун нафас хъадыйнкъаl,
Гьале бутагъыл’ оо тlетl сидядийнкъаl,
Магьаlллей аляйле нергизий тюльпан,
Ацlахьес ыкканхьей – мана воб Ватан.
Магьаlллейхъ югун йыгъ ву абайле,
Гыргына хив ааlъракейхъа савайле,
Цымас издагъ, едис соссар хъабайле,
Гьекlва, шадехье гыргына инсан,
Ацlахьес ыкканхьей – мана воб Ватан!
Цывыл хъады мыкlан мыцбы гьауйнкъаl,
Йиваршилин водун тlеле кlяуйнкъаl,
Кьыlдимийс лезимын кар адхьу сауйнкъаl,
Къутlодкlул илёйзар чолбышей къалтан,
Ацlахьес ыкканхьей – мана воб Ватан!
Йиз гёгъу басдурехье ахтыйн къаебы,
Эгьес: дувагъ адчуна издагъ сувабы,
Гёдаццен булахбы, джен улен нягъбы,
Нимей миджагдайий тlетlбишин аршан,
Ацlахьес ыкканхьей – мана воб Ватан!
Вакасана зы шавуледжар хъидяйкьаlн,
Ватанука няхъа ыхьай зы айкlан,
Мерна гьихвейр, йизын къелбы идяйкlан,
Дошемишхьа нюкьнел ооъад гьеле джан,
Гъу йизда Ватан воб, йикlен маъ Ватан!
Йизын йикl гьаммаше йыгъни мей гьекlва,
Гъу девхьей, зынар дешда:-мааджар хъекlа,
Зы йыгъни мей эбей ичlу инсан гекlа,
Къидедже улекlле не хан, не султан,
Гъу йизда Ватан воб, Ватан воб, Ватан!
|
|
Гьамбаз
Хъора гьамбаз вухьес, ши йаlхъ гивгъалас,
Хъигъебчlес сейраныс, сафарий гьааъс.
Къаджей кlяаl лигейнче шин акьва аххъы,
Зынаб манзил гьааъа, вахъа иляккы.
Шавниджаб улекlле къидедже акьва,
Девхьайнхьий гьамбазва наххварий джусхъа.
Аlйнейн вакlле гьагва акьвайлин къеква,
Гьаlкlена гьамбазмей эчlе йикlейхъа.
Джанана нахварий оlгийлна гьамбаз,
Гьамбаз дешнанбишын джан дехье тараз.
Дост дехьей, хаттlыле экlра хъигъечlес,
Дахаl орбитейхъа мысаджар ичlес.
Достус кумаг гьеъэ, хылеке аххъе,
Белке са йигъ вакlлед йидж къедже джуке.
Рыгьыlлхъа гьамбазын гьеч тозуд кlидяаl,
Досте гыней кlёкьуl оогъанче идяаl.
Суфралхъа хъадеййид джомардда са чей,
Гьамни гьамбазыка къацlакlвне гыней.
Суфрайл ооъад ыхьей са гынейн тика,
Ваlш дост аххъас эйхье, ацlахье чика.
Джанэйни гуджулхъа гейргъу бенд мехье,
Джаней гудж вухьеййиб инанмыш мехье.
Югни гьамбазаршил кlыры илдийхьей,
Са йигъни гуджука нишнаджар дехье.
Йыгъни фыкырей ихье гьамбазни гьаlкlей,
Гьамбаз пис гьаъана идяйкlан никlей,
Тахсир дешда гьамбаз улеке гиюрхьей,
Шаване алхъагьас къуейхъа кlеюрхьей.
Писда инсан дехье, вор пизда гьамбаз,
Кьалибыс сикlы джо авхъаахъа къураз.
Тозей гьеч алааlйей къаъайдкlуйн йикlяр,
Джанэйхъа илгъечlе тозаке ыкlар.
Са инсан гыргынкъус деш югра ихьес,
Джанан гьидеххъахьей, хъимехье делес.
Окl къавджей, даварни сааl гьале хьянбы,
Цlеъэн окl къалебчlы, одхьан тиканбы.
Вухьеджен гьамбазар джанан гейб гьооххъан,
Лезим дешнанбишди хъигьна имаакlан.
Писди гьамбазарше кьулелхъа айгье,
Умматни аlрейъар улеке гяйгье.
|
Нур
Са мичlейд илгъичlу ахтыйн сувабы
Верыгъылеб гьихъа шас хабар хъабы:
Кlейчlу йишин хивар чини нурейхъа,
Илгьичlийн хыленче гейдни хылехъа.
Чини сагъвалейхъа баадебы сайхыl,
Гьабкlын киоскбишей са йиджбы къахыl.
Кол’габы агыйнбы, цlыцlавхьана аlхъ,
Йикlейнче йикlейхъа гьобку Нурна йаlхъ.
Гьаlщде 'Нур' кlазетей ши гьааъас соlгьбат,
Гейд хъихьес йихъбишди арей мугьуlббат.
«Нур» ихьес йихъбишин савайлен джига,
Сабы, джувабылхъа хъавайлен джига.
Нурун ийкараъс сувабы, сиртбы,
Джуребхьани йихъбишин йикlыlн дердбы.
Нурни ишыгъыква ши йаlхъ гивгъалас,
Адхъы хыл’-хыле хааlхъаl гьивхьарас.
Шу, эй йихъбишихъа джан гёдхьананбы,
Засыб гейб аlзизба йихъейр донанбы.
Зынад шуна хьине хаlм-йигъ ойкlанан:
Цlаlхни миллетиле Нур идякlанан!
|
|
|
|
| |
|
|
| |
|
|
| |
|
|
|
|