| |
Гьарун Ибрагьимов
Вобна
Ахтыйн сувабы, ухьанан вакьаlбы,
Бакlейнче хъары, хаадын хошун хаlмбы,
Дирын духба, йишба, динджин кьаlсимбы,
Йихъийна эн хебна шадвалла вобна.
Ёргъа балкан, абырнана хьунаше,
Хебна дамазлыгъ, аваакlуна пеше,
Бухарей цlа, хыле козен маше,
Чейна симавар йыхъийна бахт вобна.
Тааки гъаlйни вукlлел илёбурна вис,
Дост-ашнайква гьааъана хошна маджлис,
Гима кьасинбишда гаф, иттуна миз
Йихъийни йикlена шадвалла вобна.
Хаалхъа, уджагъылхъа гёохьана верыгъ,
Хаlмде литейнче къеджен вузан ишыгъ,
Багъ, бустан, хек, цlабыл, барнан эракьлыгъ
Йихъийни джанана шадвалла вобна.
Йаlххъыл дирна, ыlгьтибарнана гьамбаз,
Достуке, мигьманыке хъадыйн аваз,
Духайни даватбишей илийхаlн саз
Гьайни дюнйейл йихъийна метлеб вобна.
Хизанэй, джамаъаlтэй юугун мугьуlб ыхьай,
Халкьыс хайирнана иш къулай хъиахьай,
Миллетбишди арайл нягьаlкьын дехьай
Гьирайатнани йихъийна мурад вобна.
Экlни деккихъар мехьеджен дих ясар,
Аlкlел дешда йиш-един хедын ыкlар,
Вигьнуцlни чодже гьолена чоджус зар,
Манбы дехьай йихъийна фыкыр вобна.
Насилбишей къидеджена гьоралай,
Джамаъаlтык идяакlвана варалай,
Нишисдане гьарамзадайна даллай;
Гьалална йаlхъ йихъийна дуъаl вобна.
Баба-дидейршин аlдатбы гьиваджуй
Халкьни йаlххъыл хъыlдяркьыlн гьунар къаджий,
Духайни вукlлел пегьливанна кьаччий-
Йихъийни ыlмрей гейб хебна бахт вобна.
Улес, йикlес хошун цывылийн багъбы,
Гьар суралхъа цlыцlедхьайн тlымлен тагъбы,
Иттуни инджилин гяцlийн бутагъбы,
Йихъийни ыlмырна барака вобна.
Суфрайл мыртелин ниссе, къуlман лаваш,
Бадйе гявцlу богъ алааl чуруйн бозбаш,
Къаlсинбишис биринзина сютти-вш
Йихъийни хизанна шадвалла вобна.
Мактаббы гяцlы хъаlдаххъаlн ушахар,
Гьар хивыхъаб чlекlын- чlекlын аалимар,
Маздикбишей гьыlрматукан дибирар
Йихъийни рыlгьна гумрагьивалла вобна.
“Алшан”, “Джейраным” донан ансамбыльбы,
Йихъ сум гьаъан симгъырийбы, шечlбы,
Накьра-зурна хончебынан даватбы
Йихъийн къийнийн йигъ, къийхъийна бахт вобна.
Кубус илёдзур дуъаl гъу гьааъана,
Гlыншена маргьаlмат йихъбы сааъана,
Гьарунна шечl къел-кьотlайс гудж гьоолена
Йишда нурукана шадвалла вобна.-
|
|
|
|
|
|
|
|
|
| |
|
|
| |
|
|
| |
|
|
|
|