| |
Дабыз Шавкат
Бул’бул’
Юххьанийн эване ыхыс
Гъу багъейхъа абы бул’бул’.
Няаджад доlзум гьаъас дяхыl
Тlетl-тlелейхъа абы бул’бул’.
Гивхы бытагъыл гиваакlа,
Нягьбий къизил тlетlек аакlва,
Йикlес вукканагьаlб гьоокlа
Ши шад гьааъас бул’бул’.
Йигъни рангал воб гъу ийбкlын,
Кукрабы хор-хорна гидкlын,
Тамаше гьавъийн йигъ гьадкын
Аацlенбы деш, сабы бул’бул’.
Къафазеъаб джига хъааъас,
Вукканагьаlб гьыlрмат гьааъас,
Йикlбы ачмишхьес гъар гьааъас
Йишде мейб воб гябы бул’бул’.
Гьехха хъихьа йыгъын гьавас,
Ашкь вод ыlхыlй йигъын джанас,
Тlетlеке вобна даваа вас.
Вахтал’ воб гъу хъабы бул’бул’.
|
|
Симавар
Ай гьамбазар, илякеле
Легьлемиш воохьи симавар.
Цlуlххъаlр айгье, лопа гьоле
Яваш джаб деохьи симвар.
Гары ыlхыйхаl вод хъоохъар,
Галершенче мыртар гъоохъар,
Цlа хьиннен богь къекка гьоохъар
Концерт вод гъу, ай симавар.
Кьома махмыр чейнана чейник,
Демас гиххыы эйхьи йикl,
Савмуш гьаъа гедхьанан йикl
Илебгъыйнкъаl чей, симавар.
Къавджуйнкъа кайиф кок эйхьи,
Валхъа сабы делес хъоохьй,
Нимаа илебъийн тох дехьи
Гъу хъобхьурна чей, симовар.
Хедда вод гьаlшде чейданбы,
Алюмун, юххьан, ширнанбы,
Хъады васхьа гиххьес манбы
Саджад дехьи тай, симавар.
Йигъыс йишди хончейл воохьи,
Гъу дена са лезет дехьи,
Гыргынкъус гъу кьабыл воохьи,
Суфрайн яарашугъ симавар.
Хаахъа мигьманар абыйнкъаl,
Гаф-солгьбат гьаъас сабыйнкъаl,
Одхьунийс нубат хъадыйнкъаl,
Гозет эйхьи, вал’ симавар.
Чолэйдын ишбы гьаъанкъаl
Шина абкlы обзурийнкъаl,
Ши ишиле савкlы хъооlнкъаl
Фыкыр воохьи вал, симавар.
Гьар хаахъад шу кам дехьенбы,
Гьаммаше суфрайл ихьенбы,
Сос,йиш челлякба вухьенбы
Гьуваджес тавул симовар.
|
Гыней
Гlынише идхьыйни тlаъаlмбышеъад
Гыргынчиле юугун шас гыней водун.
Ваlш джурайл’ни тlаъаlмбышди ареъад
Гыргынчиле юугун шас гыней водун.
Чуру, ниссе, хьынял, нак, балугъ, шакар,
Ала, шагав, кlпртlуф, медын хедда кар,
Эвез дехьи гынейс манчин саджад кар
Гыргынчиле югун шас гыней водун.
Ненкъуке ахаlйийгыней идедхьун,
Са вазна симедын тlамъамбы одхьун
Гумрагьда гьуваджес джун джаний вухьун.
Йишди мей ман хедын таджруба водун.
Хедын харджий гьаъа эзас, хъийшалас,
Ючlубле ваз вуккан ман гьаlсил гьаъас,
Хебба заlгьмат гьааъа йидж саъас-хъаъас
Джан гьувджен наlъмат шас гыней водун.
Гыней отlал гьау, мыкlын хъимаъа,
Лухма, кlырычl, суlч вухьайн кор гьимаъа,
Хьыл гьавъу, садхьу гьашелхъа симаъа,
Айlахье, ман гейд гунагьнан кар водон.
Сау-хъаийн хьымычlбы малас гьеле,
Гьуваджени кlатlершис, хваас гьеле,
Агар манбы дешхье, къоншийс гьеле
Ацlахье, ман шос хедын сувааб водун.
Наlгьбий гьуваадже ши гынейна гьыlрмат,
Гlынишикле къеджен йишин гьаракат,
Манчис савкlы гьооли хаасда баракат
Гlынишна магьаlмат, кумаг шас водун.
|
|
|
|
|
| |
|
|
| |
|
|
| |
|
|
|
|